ഹൃദയത്തിന്റെ വൈദ്യുത സംവിധാനം

ഹൃദയത്തിന്റെ വൈദ്യുത സംവിധാനം

ഹൃദയത്തിന്റെ വൈദ്യുത സംവിധാനം മിനിറ്റിൽ 60-100 വരെ എന്ന നോർമൽ നിരക്കിൽ അതിന്റെ താളാത്മകമായ സങ്കോചങ്ങൾ ഉറപ്പാക്കുന്നു.

ഈ ആനിമേറ്റഡ് വീഡിയോ ഹൃദയത്തിന്റെ നോർമൽ ചാലക സംവിധാനം കാണിക്കുന്നു. മുകളിൽ വലത് അറയിലെ സൈനസ് നോഡ് വൈദ്യുത സ്പന്ദനങ്ങൾ സൃഷ്ടിക്കുന്നു. സിഗ്നലുകൾ വലത് മുകളിലെ അറയിൽ നിന്ന് രണ്ടാമത്തെ റിലേ സ്റ്റേഷനായ എവി നോഡിലേക്ക് നീങ്ങുന്നു. സിഗ്നലുകൾ ഇടത് മുകളിലെ അറയിലേക്കും പോകുന്നു. എവി നോഡിൽ നിന്ന്, സിഗ്നൽ ഹിസ് ബണ്ടിലിലേക്ക് കടന്നുപോകുന്നു. ഹിസ് ബണ്ടിലിൽ നിന്ന്, അത് ഇടത്, വലത് ബണ്ടിൽ ശാഖകളിലൂടെ ഹൃദയത്തിന്റെ താഴത്തെ അറകളായ വെൻട്രിക്കിളുകളിലേക്ക് കടക്കുന്നു.

ഹൃദയമിടിപ്പ് നിയന്ത്രിക്കുന്ന ഹൃദയത്തിന്റെ സ്വാഭാവിക പേസ്മേക്കറാണ് സൈനോഏട്രിയൽ നോഡ് അഥവാ എസ്എ നോഡ് എന്നും അറിയപ്പെടുന്ന സൈനസ് നോഡ്.

ഇത് തലച്ചോറിന്റെ ഓട്ടോണമിക് നാഡീവ്യവസ്ഥയുടെ നിയന്ത്രണത്തിലാണ്. ശരീരത്തിന്റെ ഫിസിയോളജിക്കൽ ആവശ്യകതയുമായി ബന്ധപ്പെട്ട് എസ്എ നോഡ് അതിന്റെ നിരക്ക് വർദ്ധിപ്പിക്കുകയും കുറയ്ക്കുകയും ചെയ്യുന്നു. നാം വിശ്രമിക്കുമ്പോൾ, നിരക്ക് കുറവാണ്, കൂടിക്കൊണ്ടിരിക്കുന്ന വ്യായാമത്തോടെ അത് ക്രമേണ വർദ്ധിക്കുന്നു.

വൈകാരിക സമ്മർദ്ദത്തോടൊപ്പവും ഹൃദയമിടിപ്പ് വർദ്ധിക്കുന്നു. എസ്എ നോഡ് ഹൃദയത്തിന്റെ മുകൾ അറയായ വലത് ഏട്രിയത്തിന്റെ മുകൾ ഭാഗത്ത് സ്ഥിതിചെയ്യുന്നു.  സുപ്പീരിയർ വീന കാവയുടെ പ്രവേശനത്തിന് സമീപമാണ്. സുപ്പീരിയർ വീന കാവ ശരീരത്തിന്റെ മുകൾ ഭാഗത്ത് നിന്ന് ഓക്സിജൻ കുറവുള്ള രക്തം ഒഴുകി വരുന്ന രക്തക്കുഴലാണ്.

എസ്എ നോഡിനെ എവി നോഡുമായി ബന്ധിപ്പിക്കുന്ന മൂന്ന് സിഗ്നൽ പാതകളുണ്ട് വലത് ഏട്രിയത്തിനുള്ളിൽ. അവയിലൊന്ന് ഹൃദയത്തിന്റെ മുകളിലെ ഇടത് അറയായ ഇടത് ഏട്രിയത്തിന് വൈദ്യുത സിഗ്നലുകൾ നൽകുന്നു.

എവി നോഡ് ഹൃദയത്തിന്റെ മുകളിലും താഴെയുമുള്ള അറകളുടെ ജംഗ്ഷനിൽ സ്ഥിതിചെയ്യുന്നു, ഏതാണ്ട് ഹൃദയത്തിന്റെ മധ്യഭാഗത്ത്, വലത് ഏട്രിയത്തിന്റെ താഴത്തെ ഭാഗത്ത്. ഇത് എസ്എ നോഡിൽ നിന്ന് വരുന്ന സിഗ്നലുകളെ സ്വല്പം കാലതാമസം വരുത്തുന്നതിനാൽ താഴത്തെ അറകൾ സങ്കോചിക്കാൻ തുടങ്ങുന്നതിനുമുമ്പ് മുകളിലെ അറകളുടെ സങ്കോചം പൂർണ്ണമാകും.

ഹൃദയത്തിന്റെ താഴത്തെ അറകളായ വെൻട്രിക്കിളുകൾ തമ്മിലുള്ള ഭിത്തിയിലേക്ക് കടന്നുപോകുന്ന ഹൃദയത്തിന്റെ വൈദ്യുതചാലക സംവിധാനത്തിന്റെ ഭാഗമാണ് ഹിസ് ബണ്ടിൽ.

ഇത് രണ്ട് ബണ്ടിൽ ശാഖകളായി വിഭജിക്കുന്നു – ഓരോ വെൻട്രിക്കിളിനും വലത്തോട്ടും ഇടത്തോട്ടും. ബണ്ടിൽ ശാഖകൾ വെൻട്രിക്കിളുകളുടെ എല്ലാ പേശി കോശങ്ങളിലേക്കും വൈദ്യുത സിഗ്നലുകൾ എത്തിക്കുന്ന നിരവധി ചെറിയ ശാഖകളായി വിഭജിക്കുന്നു. ഈ ചെറിയ ശാഖകൾ പുർക്കിൻജെ നാരുകൾ എന്നാണ് അറിയപ്പെടുന്നത്.

ഹൃദയത്തിന്റെ വൈദ്യുത സംവിധാനം തകരാറിലാകുമ്പോൾ, ഹൃദയമിടിപ്പ് മന്ദഗതിയിലാകുകയും വ്യക്തിക്ക് കണ്ണിരുട്ടടക്കൽ അനുഭവപ്പെടുകയും ചെയ്യും. സ്ഥിരമായ കാരണത്താലാണ് വേഗത കുറയുന്നതെങ്കിൽ, ഹൃദയത്തിന്റെ താളം പുനഃസ്ഥാപിക്കുന്നതിനായി ഒരു കൃത്രിമ പേസ്മേക്കർ ചർമ്മത്തിനടിയിൽ സ്ഥാപിക്കുകയും ലീഡ് വയർ ഉപയോഗിച്ച് ഹൃദയവുമായി ബന്ധിപ്പിക്കുകയും ചെയ്യുന്നു. എക്സ്-റേ ഒരു ഡ്യുവൽ ചേംബർ പേസ്മേക്കർ കാണിക്കുന്നു, അതിന്റെ ലീഡുകൾ ഹൃദയവുമായി ബന്ധിപ്പിച്ചിരിക്കുന്നു.

തകരാറിൻറെ കാരണം താൽക്കാലികമാണെങ്കിൽ ഒരു താൽക്കാലിക ബാഹ്യ പേസ്മേക്കർ ഉപയോഗിക്കുന്നു. രക്തക്കുഴലുകളിലൂടെ കടത്തുന്ന ലീഡ് വയറുകൾ വഴി ഹൃദയത്തിലേക്ക് ബന്ധിപ്പിക്കുന്ന. താൽക്കാലിക പേസ്മേക്കർ ഹൃദയത്തിന്റെ സ്വതസിദ്ധമായ താളം പുനഃസ്ഥാപിച്ചതിന് ശേഷം നീക്കംചെയ്യാം.